✍ الطيب صالح العطا : كلام القوم ؛ الحكمة أساس الدعوة ..!!
الشيخ دفع الله الغرقان رحمه الله في صغره أرسل طالبا للقرآن في مسيد العارف الرشيد الشيخ ود بدر ولكنه لزم خدمة حمارة الشيخ يغسلها ويحلق شعرها ويطعمها حتى سماه الطلبه ود الحمارة وفي يوم قدمت أمه لتفقده وسمعت اللقب فذهبت للشيخ غضبانة قالت ياشيخ (اجيب ولدي عشان يحفظ القرآن تقعدوا لي مع الحمارة) قال ليها الشيخ؛ ولدك حافظ تعالي يوم التخريج لتري وتسمعي الشيخ ود بدر جاب لبن وحرف من كسرة العكاره شرب منها وقال(كان فيني عماره النسويها في ود الحماره) وارسل بقيتها للشيخ دفع الله وقال لشيخ الخلوة إبراهيم سمع لي دفع اول زول٠وفعلا يوم التخريج كان حافظا ومجودا ومن أبرز الطلاب!!! دي زاتها (يسقي مريدو بي نظراتو مربينا)
بعد ذلك جاء الشيخ دفع الله طالبا للعلوم الشرعية في امدرمان وإستاجر غرفة من واحده في نفس مقر مسيده الآن وكانت ماشه علي هواها ولكن كانت تحترم الشيخ واصلا الزمن داك الحياه كانت بشكلها المعروف كل زول في حالو وكل شئ متاح المهم الزوله دي قالت للشيخ بكل بساطه (دايراك تعمل لي حاجه الرجال بقوا مابيجوني)
الشيخ كتب في الأرض كده قال ليها خير تمت كم يوم جات قالت ليهو(أنا دايرك تمسح الكتبتوا انا خليت الشغله دي) قال ليها؛ مسحناها خلاص ٠ خلصت توبتها وخدمت الشيخ بقية عمرها وتنازلت عن ملكيتها للشيخ واصبح المسيد قبلة للمحتاجين وطعمة للمساكين ٠وفي ليلة من ليالي الإحتفال بام ضوابان ارسل الشيخ دفع الله ثلاثة دجاجات وديك من الذهب هدية للشيخ ودبدر الشيخ إستلم الهدية وارسل للغرقان جوال تراب من المسيد طبعا الحيران زعلوا الشيخ نودي ليهو دهب يدينا تراب لما جابوا جوال التراب كان في مجلس الشيخ الغرقان مجموعة منهم شيخ الإسلام ود البدوي فقال الشيخ الغرقان؛ شيخي أرشدني؛
ناس المجلس قالوا ليهو فهمنا كيف ارشدك؟ قال ليهم قال عليك بالتراب اي شراء الاراضي وفعلا تم ذلك واصبح رافدا للمسيد حتي الآن ٠نتمني للخليفه دفع الله التوفيق دوما٠
ونذكر كذلك زينب بت بييلا رحمها الله عندما هداها الله وأرادت الحج قال لها العلماء ان مالها حرام فذهبت للشيخ الشريف الهندي الوارث المحمدي قال ليها (حجي وجيبي لي معاك هديه كمان)
خلصت نيتها واوقفت اموالها لله ومن ضمن أوقافها مبني الأوقاف في شارع المك نمر٠
جات واحده للشيخ قالت(ياشيخنا أنا مريستي سمحه الناس مابيشتروها وجاراتي مريستهم بتكمل سريع) بكل بساطه الشيخ سالها بيعملوا مريستهم متين؟ قالت ليهو وقت السحور!!
قال ليها (حق السحور مابيبور) بعد فترة خلصت نيتها وكانت من اهل قيام الليل والمستغفرين بالأسحار!!
الشيخ الجيلي ابوقرون رحمه الله في خلوته ووسط حيرانه دخل عليهم بالقوة رجل مانع ومننط عيونوا دفر الناس والباب وقال هو الله!!!!
الشيخ أشار للحيران بالصمت واجلس الرجل ثم همس لأحد الحيران عشان يجيب عكارة تقيله ويزيدها سكر وثلج ويضعها امام الرجل دون أن يتحدث بعد شويه الراجل شرب العكاره كلها!!! الشيخ قال(الحمد لله إتفكينا الله لابياكل لابيشرب!!!)
الرجل بعد داك تاب وإستغفر وإتشهد وقال للشيخ اقرا علي وحسنت توبته٠
أيها العلماء والمشايخ تعاملوا بحكمة النبي صلى الله عليه وآله وصحبه وسلم ٠ولكم في صلح الحديبية أبلغ درس وايضا عندما (تبول) الإعرابي في مسجد النبي صلى الله عليه وآله وصحبه وسلم فابعد النبي عنه الصحابة حتي أكمل (بوله) وامر أن ينضح الماء علي(بوله) وقال (يااخ العرب ماجعلت المساجد لهذا) فقال الإعرابي(اللهم أرحمني وارحم محمدا ولا ترحم معنا احدا) فقال صلى الله عليه وآله وصحبه وسلم (لقد ضيقت واسعا) ٠احبابي الكرام لاتضيقوا علي الناس وكونوا رحماء فالراحمون يرحمهم الله٠
كسرة؛
حبوبتي التايه كانت حكيمه وكريمه ٠الفنانه مريم سالمين كانت قويه وبتجلد معظم اولاد الحله وعمك سالمين كان مانع ومرعب جدا وبعد كده بشيل حديده معاه يوم قام خالي( حمش) جلدها ليك وهو الوحيد البتخاف منو كلمت ابوها سالمين جاء سالمين عيونوا شرار دفر الباب ويكورك (وين حمش الليله بقتلوا) اها حبوبتي بتعمل في القهوه سمعت( الجوطه) مشت علي الباب قالت(مالوا حمش عمل شنو)؟ قال ليها دق مريم قالت ليهو يدق أختو؟ انا الليله ذاتي مابخليهو ٠اها سالمين الكلمه ريحتوا شويه التايه طوالي دبلت ليهو(يااخوي عندي بن سمح خلاص تعال أشرب ليك فنجان مع أختك!!!! طوالي عمك سالمين لساتكو فرشن!!!!!
رحمهم الله جميعا
وللناس القدام (الحكمه توبوا كريب)
