✍ الطيب صالح العطا : كلام القوم ؛ كلم البسمع
هذا العنوان مستلهم من حكمة للشيخ ودبدر الرشيد له الرحمة والأنوار (كلم البسمع وقود البتبع وأكل البشبع)
أرسل لي صديقي(٠٠٠) رسالة صوتية بصوت حزين وحسرة ونبرة تقطع القلب وطلب مني أن أذهب لجامعة أمدرمان الإسلامية كلية الحاسوب وتقانة المعلومات لأجمد لإبنه هذه السنة!!! لأن المطلوب منه مبلغ تسعمائة الف جنيه يعني(تسعمائة مليون) والظروف الآن لاتسمح!!! وقال لي السنة الجايه(يافي الجمل يا الجمال) حفظ الله الجمل والجمال وبارك في أعمارهم٠صديقي هذا محاسب عمل سنوات في الحكومة ثم إغترب في المملكة العربية السعودية وعاد نهائيا بعد وفاة زوجته وبني شقة ليؤجرها لتعين في دراسة الأبناء وإشتري سيارة للمصاريف(ترحال) طبعا مع ظروف الحرب لاشقة نفعت لا سيارة إتوجدت وبقي مع النزوح ومثله كثير!!!!!!!!
طبعا للأسف عشان تجمد السنه لازم تدفع رسوم التسجيل ونصف رسوم الدراسة حتي تفتح ليك صفحة التجميد ولا يمكن المعالجة يدويا شفتو الحرفنه
قلت في نفسي معظم المسئولين ومعظم ناس المعارضة درسوا مجان وبعضهم كان مع الدراسة بيصرف له مبلغ مالي ومش كده بس جامعة الخرطوم كل الوجبات مجان علي حساب الدولة تلقي الواحد ( قاشر) ماشي وين يا اخونا؟ يقول ليك معزوم غداء في الجامعة مع صاحبي!!! يعني أكلتوا ومعاكم ضيوفكم هسه بعد طلعتوا فوق سحبتوا معاكم السلم؟؟؟
قبل ايام لقيت دفعتنا مجدي مع ظروف الحرب دي سايق رقشه قلت ليهو مالك ماظاهر قال لي مع جري الحياة والإلتزامات المابتنتهي دي قلت ليهو هون علي نفسك تجري كده لما الحكم يصفر قال لي أريتو يصفر سريع زهجنا خلاص!!!! شوف الناس وصلت ياتو مرحله؟؟ يعني زول غلبتو قروش الدراسة ممكن الدولة توفر معاهد حرفية الناس يتعلموا صنعة والدولة تستفيد برضو لكن مافي بدائل وشغل مافي ياهو ياجوكي ركشة او طلبه او شركة لافي التجارية!!! بالمقابل متاح العطالة والكسير عند ستات الشاي ومحلات الشيشة والمخدرات ودا كلوا داير قروش والقروش عايزه الخفية الشفشفة وتجارة المخدرات وحاجات تانيه حامياني!!!! يعني الدولة كان ماإهتمت بالتعليم راجيه شنو من الشباب؟؟؟ يلقوها من وين الناس العلاج ولا التعليم ولا الأكل والشراب؟؟؟
أسألكم سؤال؛ هل حب الوطن خرافة؟؟؟ وما معني الوطن؟؟ النبي صلى الله عليه وآله وصحبه وسلم عندما خرج من مكة مكان مولده وصباه واهله بعد ان ضيق عليه أهلها رحبت به المدينة المنورة وعندما فتح مكة أكرم اهلها واحسن إليهم وحتي الذين ذهبوا معه إلي غزوة حنين من اهل مكة أكرمهم في الغنائم ولم يبقي بمكة إنما إختار المدينة المنورة حياة ومماتا٠فهل الوطن مكان ميلاد ومرتع صبا أم حبا وعقيدة؟؟ الخواجات قبل ماتلد المرأة بيدوك حق التجهيز للطفل وبعد ولادته بيدفع مبلغ شهري للطفل ويتم تعيين مشرف أو مشرفة تراجع هل المبلغ انفق علي الطفل مع المتابعة الدورية والفحوصات والتطعيم ويحاسبوك حتي علي وزن الطفل ويتاكدوا من إتباعك لأسلوب التغذية المناسب ويستمر ذلك النهج حتي يتخرج من الجامعة ويوفر له العمل المناسب فيخدم الدولة ويدفع الضرائب ويكون مواطن صالح يعرف حقوق البلد ويعرف حقوقه جيدا!؟؟؟ عشان كده الناس بيهاجروا عدد مهول من السودانيون بالخارج بقوا مواطنين في دول أخري!!! ونحنا سادين دي بي طينة ودي بي عجينة ولا بيهمنا؟؟؟!!! علما بانه خيراتنا العندنا أكثر من أوروبا مجتمعة!!!! ياخي عليكم الله أرحموا عشان الله يرحمكم٠لي متين الأنانية وعدم الترشيد وعدم الرشاد وإنطماس البصيرة؟؟؟ كلما يكتب الإنسان يزيد تألما يادكتور بطران ودكتور فتح الرحمن كان خليتوني مع النبي صلى الله عليه وآله وصحبه وسلم وفي حالي مش كان أحسن؟؟؟؟ وبعمل الكسرات اقول الواحد يخفف علي رقبتوا وعلي القارئ زي الواحد لما يشيلوا منه قزازة دم بيدوهوا كباية كركدي باردة تخفف عليهو!!!! أنا ماعارف ليه كركدي بارد دا بيعمل هبوط وانا مديكم قزازة دم دي جزاي؟؟؟
كسرة؛
خالي أحمد المبارك (القطم) رحمه الله كان وصال رحم وطيب وفاكهة كل مجلس لكن طبعا سواق شديد بالخلا والدقداق ويجيبك بالظلط وتلقي روحك في نفس الحته!!!
إسم قطم جاهو من أيام إنقلاب حسن حسين زمن نميري خالنا جاء يشيل حاجات وكان سايق دبابه خلاها جنب الباب وكان في جزء مكسور القطم طلع فيها ورفع الجزء المكسور وقال هو قطم الدبابه وسموه القطم!! صاحبي شيخ أويس رحمه الله كنا في مناسبه قاعدين في صينيه واحده قال لي دا القطم الجداده!! أشتهر بإسم مبارك قال هو رجلوا كويسه اصل إسمه احمد لما ولدوه أمه جاتها قروش كتيره ووقعت ليها الخته عشان كده بقي احمد المبارك!!! أنا كنت مواعده اوديهو راديو الرابعه يمسك البرنامج بالنهار يسوق الناس لما الناس يرجعوا من الشغل لكن الأجل سبق٠اها يوم كنا مع الوالدة رحمها الله في مستشفي ساهرون وصادف جات شقيقة المرحوم دكتور هشام حمور وهي كانت خريجة جديدة من كلية الطب فلاقت القطم قام قال لي دي تشبه دكتور هشام قلت ليهو دي اخته الصغيرة قامت قالت ليهو إنت بتعرف دكتور هشام؟ قال ليها دفعتي لكن طولت منو سمعت إنو إتخصص جراحة قالت ليهو ايوه كان قريب هنا!! قال ليها انا كنت بره مشيت إتخصصت بقاق!!!!!
طبعا زول جادي ونحنا متعودين عليهو البت سكتت ساي!!! باليل ضرب لي أبوها رحمه الله عمنا محمد مرغني حمور ياشيخ الطيب كيف أمك قلت ليهو طيبه الحمد لله قال لي ياخي قبيل البنيه قالت لي لقت زول تخين معاكم؟ قلت ليهو ايوه دا خالنا القطم قال لي هو كويس؟؟ ضحكتا وقلت ليهو عنده بعض الحالات بتقوم عليهو مره مره!!!
رحمهم الله جميعا
واكرم الأحياء من فضله
