✍ الطيب صالح العطا : السودان ونموذج سينما العرضة
سبحان الله بلدنا الشيطان مجتهد فيها شديد ماعارف عشان الثغرات كثيرة ولا عشان الخيرات كثيرة ولا عشان التنوع ولا عشان الجهل ولا عشان البعد عن منهج الحبيب صلي الله عليه وسلم
العلماء مامتفقين والمشايخ مامتفقين ولا متوحدين ناس السياسة خلاف متواصل ناس اللعب كورة ورياضة مامتفقين خلي دا تلقى الزول تظن فيهو الفهم والعلم كل يوم يجيك بي رأي مختلف أنا قلت قد تكون هذه المسالة راجعة لطريقة التعليم بدونا من كل حاجة حبة ومافي تخصصية عشان كده كلنا دكاترة نحير أطباء العالم ذاتهم نوصف ليك للمرض الواحد خمسين وصفة وكلنا مهندسين محترفين المرحوم الشاعر أبو قطاطي قال؛
بنيت في الموج قصور آمال
ومديت للسحاب إيدي
وشديت سرجي فوق الريح
عشان ألقاك بدور اطوي
المسافات طي٠
هندسه وبناء وطبعا كلنا مدربين والله نغلط ليك غاردويلا ذاتو ولما توجيهاتنا لا برشلونة ولا الريال بمشوا لي قدام التشكيلة بنجيبها من النت قبل اللعيبة يعرفوها!!
الطبيب عندنا يبقي وزير ماليه عادي والمهندس الزراعي عادي يكون وزير صحة وكلو ماشي لا عندنا تخصصية ولا خصوصيه الشغال في الأمن الناس عارفين مرتبو كم! ومافي أسرار ومافي مدسه!!
المهم نجي لي سينما العرضة الخواجه جاب ولده متعلم وشاب متحمس أول حاجه عملها ضرب السينما جير والكراسي بوهيه وصلح الكنب بتاع الشعب وشاف الناس بتحب الأفلام الهندية بقي كل يوم فلم هندي والله الجماعة يغنوا مع جانوار تقول سبنا دي كاتبه ليهم جوابات والعجب من أجل أبنائي الدموع عشره عشره!! المهم الخواجه لقي السينما مليانه لكن الدخل قليل مامتناسب مع العدد قام مشي جاب إثنين طرش وبكم ومانعين شكلهم شغالين كمال أجسام مسكهم واحد شباك التذاكر وواحد بيقطع التذكره نصين عشان تدخل اها الدخل إتحسن بقي مشكلتو راس بيتنا الحله كلها طالعه في رأس الصالون بتاعنا بتحضر الفلم مجان قام الخواجه جانا بالنهار وفاوضنا قال بديكم عشرة تذاكر يوميا وافقنا وعليه كلمنا اولاد الحلة إن جدنا منع الصعود في راس الصالون قال البيت بيقع وطبعا عمال السينما بيتغدو في بيتنا وبندخل السينما من باب النص بي تصديق العشره تذاكر بندخل عشرين ومرات أكثر يعني اولاد الحلة ملح طوالي الخواجه عمل فيها ماعارف لكن بعد شهرين عادت المشكلة السينما مليانة والدخل قليل!!! الخواجه إكتشف الطرش شغالين لاري يعني واحد يقطع التذكرة ويستلم القروش الثاني بيعمل فيها شرط التذكرة وبدخلك وبرجع التذكرة تاني للاول ويبيعها تاني شهرين بس الشيطان فتح ليك الطرش ديل قربوا يتكلموا ذاتو!!
غايتو الخواجه بعدها سافر اهلو!!! ودا الحاصل علينا ربك يحلها آية الكرسي مفروض نعلمها أطفالنا قبل المشي وربك يصلح الحال ٠
كسرة؛
الأستاذ صلاح محمد عيسي عنده أصحاب ظراف بيجوهوا كل يوم شايلين مالذ وطاب بيقضوا معاه السهره يستمعوا لأعماله الجديدة ويتعشوا ويمشوا اهلهم مبسوطين٠في واحد بقولوا ليهو كفتيره إتلح ليك الأستاذ كل يوم يجي شايل شلاليفوا وشايل بطنوا (بلك) من أمو وبعد كده ونستوا بايخه الجماعه قالوا للأستاذ زولك دا تاني لو جانا نحنا مابنجيك هنا ٠المهم الأستاذ رسل ليهم قال ليهم انا عامل ليكم حلة زقني بالدجاج عجيبه إتعشوا معاي ونتفاهم في موضوع الزول دا ٠المهم جو عليهو أول من قعدوا سمعوا صوت كفتيره ياأستاذنا الأستاذ قال ليهم كل زول يعمل ماشي مشوار وانا بدس الحلة تحت العنقريب المهم كفتيره دخل كل واحد قال عذر انا ماشي لي خالي وانا عندي مناسبه علي اساس يلفوا عشره دقايق يكون إتخارج الأستاذ قال ليهو ياكفتيره النهار دا انا عندي مواعيد مع شاعر عشان كده داير أطلع واقفل الباب الأستاذ بيلملم في حاجاتو كفتيره كلب بوليسي عديل شم ريحة الحلة دنقر تحت السرير سحب ورك دجاجة وقال ياأستاذ الليله زقني؟ رد الأستاذ بي زعل زقني وزيد عذابي!!!
البلكات عذبوا الناس يومتا قدمت زميل عشان يركب الحافلة قلت أعمل شغل الحبوبات أدفع ليهو وانا بحاسب في السواق واحد دنقر قال ليهو انا ماشي السوق لكن (بلك) يامعلم السواق بي صوت عالي قال ليهو الثلاثة القاعدين في الكنبة الأخيرة (بلكات) العربيه دي ماشه بي مويه؟ جماعتك لبدو ساي انا الدافع للزول لبدتا٠
اللهم رقد الضحاكات وقلل البلكات
