✍ الطيب صالح العطا : كلام القوم ؛ القيامة تقوم ..!!
مر علي فيديو لسيدة مصرية سألها المذيع في إستطلاع في الشارع أظنه عن أمنياتها للسنة الجديدة؟ فقالت(القيامة تقوم) وكرر السؤال وقالت نفس الإجابة!!! فتذكرت حديثي مع شيخ مصطفى الأمين رجل العجيجه جليس المصطفى صلى الله عليه وآله وصحبه وسلم في أوآخر سنة الفين وثمانية للميلاد أي قبل وفاته بشهرين قال لي(بعد كده مافي حاجه يقعدوا ليها)!!! سرحت بأفكاري فتذكرت قصيدة المرحومة ليلي المغربي والتي غناها الاستاذ تاور؛
حياتي حلوه والزمان أهداني ريد وعمر جديد؛
وقارنت بينها وبين أغنية القلع عبد الحفيظ والشاعر شادول في الأيام الأخيرة؛
إن شاء الله القيامة تقوم!!!!
وتذكرت الشابي وهو يقول؛
إني إذا خمدت حياتي
و أنقضي عمري
وأخرست المنية نائي
فأنا السعيد بأنني متحول
عن عالم الآثام والبغضاء
الله عز وجل ضمن لنا الرزق وأمرنا بالعبادة فتركناها إلا من رحم ربي وتقاتلنا علي الرزق واصبحت الحياة مادية بحتة وسقطت القيم الفاضلة والأخلاق الكريمة وأصبح التقييم حسب الجيب :
رأيت الناس قد ذهبوا
إلي من عنده الذهب
رأيت الناس منفضه
إلي من عنده الفضة
فأصبح من يديرون حركة المجتمع يتعاملون بذلك حتي صار العامه كذلك إذا دخل علي الناس صاحب المال وقف الجميع وإذا دخل المعلم المربي ناس المناسبه بس!!!
ياحليل ياماشي لي باريس
جيب لي معاك عريس
شرطا يكون لبيس
من هيئة التدريس
كنا أمة نحترم المعلم ونحترم الموظف الذي يخدم المواطنين والوطن بإخلاص هسه بقينا نقول (النسوان والموظفين يجوا بي هنا)!!!!!
في حالات الدفع رغم أن النقود الآن عند النسوان أكتر!!! ذكرنا في الحلمنتيش؛
آه من الحياه وأحي
موظف في وزراة الري
ثلاثين جنيه بصرف
َلا بتكفي ولا بتستر البي
أم أولادي إبليسه
تنكد في العلي واللي
تقول لي ياريتني
لا شوفتك ولا عرفتك
أعرس لي مغتربا
يسر بالي ونتسكع
شوارع روما تعرفنا
و كمان باريس
يامجنونه إنطمي
دي خلقه بتمشي
لي باريس؟
أصبح المال غاية كل حي ولايتحقق الناس عن مصادره العريس غني ومرطب ومابهم الباقي واحد قال لي؛ لما كان عندي قروش تحصل وفاه الف تلفون يجيني والجنازه ذاتها ترجاهو قال لي بعد فلستا أمي ذاتها اجيها تقول لي؛ (هي والله نسينا فلان مات)!!!!
وذكرت لي قصة رجل كان عنده خمسين لوري وفجأة ماله راح فحصل وفاة في الحلة دخل الفاتحه زول قام ماف و أدوه الفاتحه جالسين وبالجنبه كده!!! الراجل بقي يبكي قال ليهم(زمان كنت بجي كلكم تقيفوا هسه بقيتوا تدوني أم صفيحه)؟؟؟ يعني بالجنبه٠وهذا القتال علي الرزق والموارد عالمي ما برانا لي درجة الأغنياء في العالم شايفين حياتنا مامهمه عشان كده مفروض يموت كل الفقراء في بلادي وأفريقيا خاصة وفي البلاد الأخري وقرروا أن يعيش مليار فقط في العالم للمحافظه علي الموارد والباقي عدد زايد ساي!!! يعني نحنا هنا بنقاتل عشان فتافيت!!! مانفرح ساي عشان كده الكرونا والضنك وحاجات تانيه حامياني؟ الشيطان يدير العالم بمزاج!!! قال تعالي(وإستفزز من إستطعت منهم بصوتك وأجلب عليهم بخيلك ورجلك وشاركهم في الأموال والأولاد وعدهم ومايعدهم الشيطان إلا غرورا) الإسراء ٦٤
الشيطان عمل شغله ومازال مخلصا لعمله ونحن تركنا شغلنا وصرنا نعمل معه سبحان الله لدرجة نحنا عندنا نيلين من أنهار الجنة لا قادرين نشرب منهم لا قادرين نولد كهرباء ولا حتي شمسنا الحاره مستفيدين منها في الطاقة ولا نزرع أرضنا البكر تسافر البلد كلها أرض زراعية فاضيه كان جيت شايل طوريه يطلعوا ليك الف شخص(دي واطاتنا وارثينها من جدودنا حكر كمان ) خلاص بختكم عاينوا فيها لما القيامة تقوم!!!! مليون بروف وملايين الدكاتره والماجستير والشهادات ومافي فايده؟ مليون سياسي ومية حزب!!! ومافي فايده الذهب نسمع بيهو سمع اليورانيوم نسمع بيهو سمع شواطئ في البحر الأحمر تصلح مواني ولأغراض متعدده!!! مافي فايده!!! ثروة حيوانية هائلة ونحنا نستورد ملايين علب اللبن من الخارج واللحمه مابتنهبش الطماطم المسكينه دي رافعه قرن!!! ياناس كدي فكروا في الحال دا وماتقول لي إبتلاء فرمالتنا المابتنتهي دي مره الشيخ عيان قلت ليهو ياشيخ دا مدد قال لي(المدد بنعرفوا والمرض بنعرفوا)
هسه نحنا شكلنا راجين القيامة تقوم!!!! رحم الله الأموات والأحياء وأحسن عاقبتنا٠
كسرة؛
حسن الشفيع (ابوقرون) رحمه الله كان خفيف الظل ورجل نكته رقم قصر قامته كان ظاهرا جاذبا مره قال لي ضربتني فلسة وجوعة الصلاة ذاتها يومين ماصليت قلت ليهو لي شنو ماتصلي؟ قال لي مامطمئن!! المهم قال لي شلت حق مواصلات من جارنا قلت أمشي السوق العربي إمكن القي شئ قال مالقيت حاجه وباقي القروش وقعت مني قال؛ قلت امشي شارع المطار أرقد في مجسم القدس العصرية ناس اللواري بيرجعوا أركب مع أي واحد منهم أرجع٠
اها مشيت بي رجلي لما داير اقطع ظلط المطار وقفت لي عربيه لقيتو أخونا هشام تاج السر قال لي أركب شيخ البرعي في المجاهدين قلت ليهو ماماشي لي أي زول قال لي مالك قلت ليهو مفلس أداني مية الف ختيتها في جيبي وركبت معاه وصلنا لقينا الشيخ والناس كثيره والمداح التجاني وودضحوي وعالم سلمنا على الشيخ والمديح دور وطبعا ابوقرون رقاص في المديح ودموا خفيف قدل كده ومشي علي شيخ البرعي الشيخ وضع ليهو نقود في جيبه والجماعه الجنب الشيخ كلهم رقعوه جيبوا إتملأ والمداح يعاينوا قايلين بيجي يديها ليهم ياأمتو اقدلوا وطوالي علي الباب شيخ البرعي أشار ليهو تعال قال ليهو (والله لو بتخلفني هسه ماأجيك) وجري علي الشارع صادف تاكسي ركب وقال ليهو(ابوقرون طوالي) طبعا في الوقت داك لا كبري سوبا لا المنشيه مشوا بي كبري القوات المسلحة وكوبر عدا النقود أكتر من مليون وطبعا مليون زمان ماهسه لما وصل حلة كوكو إشتري عتوت وخضروات وصل البيت ضبح وشبع تمام واخد رقده وقام إستحمي وإغتسل وجاء علي صلاة المغرب قال لي رتلت ترتيل شيخ الزين مايقادرني واخدت لي بكيه صغيره كده للضمان٠
الكاش بيطمن!!!! رحمه الله
