✍ الطيب صالح العطا : كلام القوم ؛ هل نغير نظرية بلال عبيد
اخي وصديقي ونسيبي المرحوم بلال عبيد كان وصالا للرحم كريما وطيبا ومتسامحا إذا عاشرته تري حديث النبي صلى الله عليه وآله وصحبه وسلم (الخير في وفي أمتي إلي يوم القيامة) كان متساهلا جدا له مقولة مشهورة (مشي مشي دي بلد مغفله)!!! طبعا فكرت في كلامه كثيرا ورجعت لما حكي لنا انه في زمن الخواجات المحافظ برمبل يغسل (زنكي) اللحمة والخضار يوميا بالماء والصابون وكذلك ينظف ويغسل السوق والشوارع الرئيسية بالديتول كمان والسوق منظم ويغلق الساعة الخامسة مساء إلا أماكن معينة والجميل سوق الطواقي للنساء فقط يكسبن رزقهن وطبعا دا عندي معاه ود خاص لحبوتنا فاطمة كان اولادها تجار مامحتاجه لكن عندها موهبة ورغبة في العمل والتميز كنت بمشي ليها وانا طفل واذكر بسمتها الجميلة وإستقبالها الرائع منطبعات في ذاكرتي لكن المطبوع أكثر (الشلن) الكان بتديني ليهو يعني خمسة قروش كان بريحني شديد ربي يرحمها وقالوا( الترماي) مواصلات رخيصه ٠
من علايل أبرووف للمزالق
من فتيح للخور للمغالق
قدله يامولاي حافي حالق
بي الطريق الشاقي الترام
المهم قال ليك الشيخ المكاشفي قال ليهم خلوا الجماعه ديل خمسه سنه!! الجماعه أصروا الناس دي تطلع والإستعمار خلاص
ياغريب يلا لي بلدك
سوق معاك ولدك
ولملم عددك
علم السودان يكفي لي سندك
الجماعة طلعوا لكن لا شالوا ولدهم ولاعدتهم؟؟؟ وعينك ماتشوف إلا النور!!! الإقتصاد كان قوي والجنيه داقي صدروا بعد داك جاهو صداع ولوز وخمة نفس وتضخم في القلب ومصران وبروستاتا وخشونة ورطوبه وبواسير وضغط وسكري وملاريا واخيرا حمي الضنك لكن برضو مجاسف!!!! المشاريع كلها راسها ضرب ومشروع الجزيرة جاهو شلل إهتزازي!!! ناس حلفا إتهجروا ومالقينا فائدة كهرباء ساي ماجاتنا؟؟؟ وارضنا إتعمل فيها سد النهضة لا لقينا كهرباء ولا أمنا الغرق؟؟
واحد قال لي ياولدي زمن عبود المظاهرات كنا بنفلق بالتفاح!!!؟ طبعا التفاح بيكون زعلان لي هسه عشان كده ابي يرخص وبقي مسيخ!!! قلت ليهو ياعمنا الناس فلقوا راس السنه بالبيض هسه البيضة بقت بي الف َومئتي جنيه وفلقنا بالمويه ذاتها غلت!!!
المهم الحكم مدني عسكري مظاهرات لما خطة المدرب بقت ظاهرة والتشكيلة معروفة واللعيبة ذاتهم عجزوا واحد ساي داير يعتزل زي هيثم مصطفى والعجب مافي التحية لامير كمال ورمضان عجب!!!
المهم ضيعناك وضعنا وراك هي النغمة المححبة لينا!!! وكان وكنا دي ونستنا المحببة؟؟؟ صدق من قال؛
إذا تعطلت لغة الإبداع عن امة إجترت ماضيها!!!
عندنا حاجه لذيذه كده نعاين في الشرارة تبقي جمرة والجمرة تولع لما تبقي حريقة ويطفوها ناس الحلة حتي نرجع نشوف المشكلة وقد يكون الحل ذاته مشكلة!!!!
اي دولة عندها مشكلة مع إتحاد مع امم متحدة نتدخل ونصالحهم تجينا المشاكل مانلقي حجاز؟؟؟ تقوم الحروب نرسل جيوشنا من الحرب العالمية نحارب تجينا الحرابة يتآمروا علينا!!!
مواردنا تخرج مننا ونحنا نستورد من الخارج ومرات نستورد سلعنا ذاتها من الخارج زي السكر؟؟؟؟ نخلي زراعة القمح من اجل عيون الغالية ماتزعل!!! وبعد دا مرات تدينا إغاثة ومرات تحتكر!!!
أهم حاجه في الدولة الكهرباء والماء الكهرباء ناقصه ومن الإستعمار ماجات بنية صحيحة ليها وبي نقصها دا اكثر من سبعين في المائة للقطاع السكني والباقي للإنتاج؟؟؟ والموية معظمها آبار وبعضها مالح هاك نيل الفراديس دا!!!
الاسواق الحرة تحكمت في سعر الدولار واسعار السلع لمدة عشرة سنوات ايام الرجل الفاضل الشريف عبد الوهاب عثمان رحمه الله ٠إتفرتقت بجرة قلم لصالح سياسة التحرير لا تحررت البلاد ولا فريق التحرير رجع الممتاز!!!
الخراب الناعم عرفناه في السنوات الأخيرة جانا الخراب الممنهج (نفرتقها طوبة طوبة) لحدي ماجات الحرب وتمت الناقصه!!! ولسه تتسد بي جاي تتقدا بي هناك!!! طبعا نظرية المؤامرة مستمرة ونحنا ماناكرنها لكن في حاجات ساهله يعني مثلا شعب كامل وحكومة ماقادرين ننظف بلدنا؟؟؟؟ ولا أدمنا الوسخ يااخونا النظافة من الإيمان وحب الاوطان من الأديان عباس الشيخ صاحبي قلت ليهو مابيراعوا حرمة الميت قال لي؛ الحي عملوا ليهو شنو؟ والعندوا حرمة قادر يعمل ليها شنو؟
غايتوا بعد الحصل لينا دا لازم نظرية بلال عبيد تقيف وتبقي بلد مامغفلة وتعرف مصلحتها تماما٠ نعرف ان هناك مخلصين من المسئولين ومن عامة الشعب نقف معهم قلبا وقالبا حتي يتغير الحال العلماء والمشايخ والمفكرون والسياسيون خلوا حب الدنيا والانانية وحظوظ النفس وتعالوا إلي كلمة سواء من اجل الوطن الجريح فالله سائلكم يوم القيامة ورسول الله صلى الله عليه وآله وصحبه وسلم شاهدا عليكم وجوارحكم تحكي فهل تظنون أن العمر سيطول وهل تضمنون التوبة في الزمن المناسب؟؟؟ والبداية بيكم في الحساب نسال الله السلامة وحسن الختام٠
كسرة؛
واحد جاء للشيخ قال ليهو جملي إتسرق شد حيلك ياشيخنا نجيب الكرامة للفقراء الشيخ قال ليهو اطلع بي وراء بي جاي اها الزول طلع حسب كلام الشيخ في خرابة قدام لقي جملوا بارك فيها اها مسك الجمل اول زول جاء ماشي قال ليهو قول للشيخ الجمل لقيناهو ماتتعب!!
أخونا النور ود الزاكي من احباب الشيخ راوي مديح ومادح صوتوا جهور لكن عنده حاجه اول مايسمع مقطع من أغنية بتشبك َمعاهو النهار كلوا ومابكون حافظها يكون قاعد جنبك فجاة يردد المقطع ويسكت حتي اخونا د٠ حافظ جاد الله بيقول لي وين صاحبك الزي الشريط الملصق بي منكير؟؟ وطبعا للجيل الحالي شريط الكاسيت زمان لما ينقطع بيلصقوه بي منكير تسمع حبه ومحل القطعة بيكون فاضي!!! اها ناس المسيد متعودين عليهو حتي الشيخ لما يسمع صوتوا بيقول ليهم النور دا فطروه لما يغني بكون جعان!!! يوم جانا ضيف لزيارة الشيخ وشكلوا اول مرة يجي اها دخلناهو الصالون لإكرامه اها شيخ النور الناس صانه يدور
أشوفك بكره في الموعد أشوووفك
ويسكت
رشقتني عيونوا وبقيت مجنونوا من اول نظره
ويسكت اها الضيف إتحير وإرتبك واظنوا قال جيت غلط ولا شنو؟ انا لاحظت ليهو وبدا يتضاير مشيت عليهو وهمست في أذنه قلت ليهو؛ أخونا دا بدوا ليهو العلاج لكن لسه ماكمل!! طوالي قال لي انا ذاتي قلت كده!!! الراجل إرتاح وجرا نفسوا!!!
حفظ الله الجميع
ورحم من إنتقلوا آمين
