✍ الطيب صالح العطا : كلام القوم ؛ أنت السبب
أحد المشايخ كان مبسوط من أحد حيرانه لإنضباطه في الصلوات وحضور الدروس والحفظ فزوجه إبنته ولكن سرعان ماحدثت مشاكل وإتضح ان الحوار يضرب زوجته وطلقها كمان!!! إستغرب الناس من تصرفه ورجعوا للشيخ أليس هذا الذي إخترته فاجاب الشيخ أنا السبب أعجبني دينه ولم أتعرف علي اخلاقه مشيرا إلي قول نبينا صلى الله عليه وآله وصحبه وسلم (إذا جاءكم من ترضون دينه وخلقه فزوجوه إلا تفعلوا تكن فتنة في الدين وفساد كبير) عدد كبير من الناس يعتقد أن العبادات وحدها تكفي لايعلم أنها جزء قليل من الدين وان المعاملات تمثل الغالبية العظمى ففيها الاخلاق والثواب الأعظم ٠الحديث القدسي (الخلق عيال الله اقربهم إلي الله أنفعهم لعياله) وحديث الحبيب صلى الله عليه وآله وصحبه وسلم (اقربكم إلي يوم القيامة احاسنكم اخلاقا الموطئون اكنافا الذين يألفون ويؤلفون) فالرجل صاحب الأخلاق صون للأسرة وضمان للتنشئة الكريمة ٠عشان كده بيقولوا؛ أخطب لبنتك ولا تخطب لولدك!!! أما بخصوص إختيار الزوجة (إظفر بذات الدين تربت يداك) واهلنا بيقولوا داير تشوف فلانه شوف أمها!!! والمصريين الشفوت بيقولوا؛ اقلب القدرة علي فمها تطلع البنت لي أمها!!! انا ماعارف الجاب القدرة هنا شنو؟؟؟؟؟ وبداية الإحسان للأبناء قبل ميلادهم إختيار الزوجة الصالحة فهي الأم الصالحة ولا ننسي(تخيروا نطفكم) ولا ننسي(تزوجوا الودود الولود) وطبعا دي البدايات والأساس لكن تعال نشوف الفشل بيجي وين؟؟ (اطب مطعمك تكن مستجاب الدعوة) (الرجل يرفع يديه للسماء وماكله حرام ومشربه حرام وغذي بالحرام فأني يستجاب له)!!!!! قول واحد!! نشوف ودبدر الرشيد قال شنو؛ ماني حاسد بلد الفاسد!!! الحسد بياكل الحسنات زاتها خلي فساد الذرية!!! قول إتنين٠اها وتاني؛ قال مابتعجبني الجبهة الندية من ذكر الله ولا العين البتبكي من خشية الله بعجبني بياض النية البظهر في الذرية!!!!! شفتوا الشغل دا كيف يعني لو نيتك سوداء بتجي في العيال بيضوا النية ٠قول ثلاثة٠تربية الأبناء على الكذب زي قول ليهو ابوي مافي طلع وبكره العرس قول لي ناس المدرسة جدي مات وكذبه بيضه وكذبه رمادي لما الفاس تقع في الراس!!!! قول اربعه٠قطع الأرحام ومشاكل الجيران وإقحام الأطفال فيها ٠قول خمسه٠مشاكل الأم والأب ورفع الصوت أمام الأبناء يترسخ في النفوس ٠قول سته٠أن يروك وانت لا تحترم الكبير ولا الصغير!!! قول سبعه٠ماداير أزيد ولكن اللبيب بالإشارة يفهم!!! علي قول الشاعر
وينشأ نأشئ الفتيان منا
علي ماكان عوده أبوه
ومن شابه اباه فما ظلم!!!
وبعد كده نقول فساد وسرقه ونهب وجيل بايظ وننسي الاسباب معقوله بس!!!
بالمناسبة د٠حيدر البدري عنده قصيدة ايام الدنيا كانت رايقة بتذكر مطلعها؛
إنت السبب خليتني أمشي معاك طريق مليان شقي
وآهات وحب٠
تعدد الأسباب والموت واحد يادكتور!!!!!
كسرة؛؛؛
نرجع للمداح طبعا كان بينشروا المديح عبر المناطق بالسفر بالدواب وطبعا العضة مهمه جدا وقفوا قدام باب واحد بيحب المداح وقفتهم كده الديك صاح اها الشغله شبكت الراجل مرحب مداح الحبيب أدخلوا قالوا ليهو ماداخلين ديكك ينبزنا قال ليهم بضبحوا قال والله ماتضبحوا وننط فوقوا ماندخل قام ضبحوا قالوا ليهو بعد كده بدخل بالسلامة (مدحه معروفه يدخل بها علي المشايخ)!!!!!
المداح جو مارين بي منطقة راجل كريم لكن مابيحب المداح لأنه لو عجبهم الجو بيقعدوا من الباب بيقول ليكم ضيوف ولا مداح جماعتك دسوا الطارات جوه الخرج ولفوهم بي الهدوم اصلا قالوا نتعشي والصباح نطلع قالوا ليهو ضيوف إتفضلوا ربطوا دوابهم وشالوا الخرج ودخلوا الراجل بدا يكرم فيهم بي رحابه وقام من طيبتو داير يصلح ليهم محل الرقاد فشال الخرج ولمس ليهو طار جو جارين عليهو لالا خليهو عفشنا بنلموا برانا طوالي كشر وإتغير قالوا ليهو نعل مافي عوجه؟؟؟ قال ليهم العوجه لمستها بي يدي دي!!!!!!
ياناس إتحاد الكورة دحين سته وتسعه دي ماخليناها زمان؟؟؟؟
زمان واحد إتكيف مني قال لي شكلكم بدوكم بالدولار قلت ليهو ابدا سوداني قال لي طيب المرتب كم قلت ليهو مدخل الخدمه ثلاثون جنيها قال لي في الكم؟؟؟؟ قولت ليهو في الشهر لكن في ترحيل ذهاب وإياب ضحك وقال لي هي قول ادوك ليها وخلوك في البيت!!!!!!!
