✍ الطيب صالح العطا : كلام القوم ؛ كلام ميت لميتين
قال تعالي (ولنبونكم بشئ من الخوف والجوع ونقص من الأموال و الأنفس والثمرات وبشر الصابرين) البقرة ١٥٥
من العام الميلادي الفين وعشرين رأينا هذه الآية حية بيننا مات خلق كثير من اهلنا وجاءت الحرب التي تتواصل حتي الآن ماتركت أسرة إلا وتجرعت مصيبة الموت فملأت الجثث البيوت والشوارع والمدارس والمساجد والسايفونات وساتحدث حديث المشاهد والمتابع لهذا الأمر بالذات في ولاية الخرطوم وكيف ان الوالي بنفسه ظل يتابع عمليات نقل الجثامين إلي المقابر المختلفه بالولاية ومعه وزارة الصحة والهلال الاحمر وغيرها من المنظمات والمتطوعين وطبعا سيد الشغلة درمه في الفاعلية والإجتهاد فإمتلات المقابر بالذات في أحمد شرفي حتي هاجمت اطراف الشارع وليق أمدرمان ولاتوجد مساحات قريبه للتوسع فيها ونحمد الله في ناس إنتقلوا ودفنوا خارج السودان من أبناء ولاية الخرطوم تخيل لو ديل قدر لهم أن يموتوا في الخرطوم شكلنا كنا حانرجع لقصة زمان لما تبيع البيت يقولوا ليك بالميت بي كده وبدون الميت بي كده ودا طبعا لما كان الناس بيدفنوا في بيوتهم!!!
قلنا ياناس لازم نتطور ونواكب ونخطط ونعمر بمنهجية لكن اضان الحامل طرشا!!!
نحنا عندنا في الوطن العربي تجربتين المصرية والسعودية واقرب لينا تجربة البقيع (بقيع الغرقد) او بقيع عثمان وطبعا اول من دفن فيه هو عثمان بن مظعون وقال رسول الله صلى الله عليه وآله وصحبه وسلم (ضعوا حجرا علي راسه حتي أعرف صاحبي) وسيدنا عثمان بن عفان إشتري الجزء الشرقي من يهودي واضافه للبقيع وقال؛ عسي ان يدفن فيه رجل صالح وكان هو اول من دفن فيه ٠وعمر البقيع الآن اكثر من الف وأربعمائة وسبع واربعون عاما ومازال الناس يدفنون فيه ويستوعب كل الأعداد!!! لتنفذ هذه الفكره لابد ان تتكون لجنة من جميع جهات الإختصاص العلماء القضاء الاوقاف الشئون الصحية الشئون الإجتماعية والشئون الهندسية الشرطة وكل الجهات ذات الصلة ولتكون مقابر احمد شرفي نموذجا المرحلة الأولي نظافة المقابر وإعادة تخطيطها بصورة علمية علي نظام مربعات مع مراعاة ممرات ترتب الحركة داخلها ٠كل مربع ياخذ رقم وتوضع لافتات كبيرة علي كل مربع مكتوب فيها أسماء الموتي وتدخل البيانات في الحاسوب الذي يوجد في غرفة الإستعلامات ٠تنظم الإناره وتتم معالجة للممرات حتي نضمن عدم نمو الحشائش فيها ٠كل مربع يكون فيه عدد معروف من القبور يتم مراجعة المربع الاول إذا وجد صاحب القبر كما هو محفوظ يقفل هذا القبر ويشار إلي ان هذا القبر لايفتح مرة أخري اما بالنسبه لبقية القبور نجد العصعص (عظمة الذنب) تجمع في قبر واحد في ذات المربع وتستعمل القبور في إستقبال موتي جدد تسجل اسماءهم في اللافتة الكبيرة ويسجلون في الحاسوب ٠بعد سنوات يفتح مربع آخر وهكذا تستمر المقابر إلي ان يرث الله الأرض ومن عليها ٠ طبعا دا مقترح وكلنا راجينا الموت (وماتدري نفس باي أرض تموت) لقمان ٣٤
علي الأقل كان متنا نلقي مكان الشغله ماشه قافله ومافي مساحات٠ماتبقوا زي ناس المعاشات ونهاية الخدمة نقول ليهم صلحوا الحكاية يعملوا نايمين لما الواحد ينزل المعاش يشتكي!!! زمان ماقلنا ليكم٠!!!!
كسرة
زميلنا اسامه خلف الله كان محاسب ماسك خزنة في الشغل زي الساعه خمسه مساء جوهو إثنين زملانا عندهم مشكله والبنوك قافله وطبعا زمان مازي هسه طالبين مبلغ يحلوا مشكلتهم والصباح بدري بيرجعوا القروش وكلموا ليهو رئيسه المباشر عشان كان رافض شديد المهم تحت الإصرار والضغط اداهم المبلغ وقال ليهم أمشوا موتوا لي كمان!!!!!
ولدنا وجارنا درس التدريب المهني قسم النجارة وطوالي فتح دكان في الثورة ومبسوط تاني يوم جات جارته في الحله شايله طلح في شوال قالت ليهو كسروا لي قفل الدكان ومشي إتجند بوليس!!!!!
لي ناس الرياضه عندنا عمنا فاروق رحمه الله تاجر وبيحب يشجع الشباب فريق الحلة بشارطنا القون بي (ريال) يعني عشره قروش وكانت كتيره تجيب قون اللعيبه جارين يهنوك والحكم جاري يسجل إسمك وإنت جاري بره بتفتش في عم فاروق!!!
عمنا الزين سكرتير نادي الحرية رجل محنك دا شدة ماخطير لما يجي يديك العداد مابيطلع القروش بره بيعدهم جوه الجيب باللمس ويطلعهم ليك محسوبات!!! اها مره اللعبه في الليق والحرية فريقها ممتاز لكن الفريق الخصم محفز من فريق تاني منافس فميتين موت بالذات القون اها فضل ثلث ساعه لنهاية المباراة عمك مشي وقف وراء العارضه قال للقول شنو تقبض فيها كده عرفنا دفعوا ليك نحن بنديك احسن المهم اقنعوا لكن القون قال مابيثق في زول والحل قال ليهو ادفنها لي جنب العراضه اها في كلامهم دا واحد من الحريه واظنه ميسرة شات كوره قربت تشرط الشبكه في الزاوية البعيده طوالي ابوالزين قال ليهو ادفنها ليك يامعفن ولا احفز بيها الرشاك حي انا!!!!!!!!!
